برتاح اوي لما باجي هنا
مع إني مش بفهم حاجة مـ للي بكتبو ! :)
بس ببقى حاسة اني بشيل حِمل من على كتافي
وبرميه ..... معرفش على مين
بس يمكن على حد ايديه تجيبو بالصدفة هنا
ويمكن على حد نفسي ييجي هنا ، معرفش
بسأل نفسي كتير هي ليه الناس رغاية كده !
ليه ميسكتوش كلهم ويكتبوا وخلاص
ليه الدنيا زحمة ؟ ، ولية محدش بيحترم حد
ليه كل الناس بتحكم عليك من شكلك
من غير ما تحس بيك ولا تفهم دماغك حتى
وأنا ليه كل ما حد يقوللي انتي زعلانة ؟
أقولو لأ أبداً واقوم ضاحكة ف وشو
مع اني ببقى نايمة اليوم اللي قبلو ودموعي على خدي
ليه مش بمسك حد وافضل ازعق واتكلم بصوت عالي
واقعد احكي عن كل حاجة مدايقاني ، يمكن ارتاح !!
ليه دايماً بكتفي بالسكوت وبالورق وبشوية حروف ؟
لية بختار دايماً دنيا تانية عن الدنيا دي وأعيش فيها
اكتفي بصوت زينب فرحات وهي بتوصف
البنت اللي تقرب للشتا ، وبتبعت استغاثة من سُكات، وأجيب شيكولاته
آكُلها وانا راسي عالمخدة ... أنام وأصحى على نفس الحال .
