بنت تقرب للشتا

برتاح اوي لما باجي هنا

مع إني مش بفهم حاجة مـ للي بكتبو ! :)

بس ببقى حاسة اني بشيل حِمل من على كتافي

وبرميه ..... معرفش على مين

بس يمكن على حد ايديه تجيبو بالصدفة هنا

ويمكن على حد نفسي ييجي هنا ، معرفش

بسأل نفسي كتير هي ليه الناس رغاية كده !

ليه ميسكتوش كلهم ويكتبوا وخلاص

ليه الدنيا زحمة ؟ ، ولية محدش بيحترم حد

ليه كل الناس بتحكم عليك من شكلك

من غير ما تحس بيك ولا تفهم دماغك حتى

وأنا ليه كل ما حد يقوللي انتي زعلانة ؟

أقولو لأ أبداً واقوم ضاحكة ف وشو

مع اني ببقى نايمة اليوم اللي قبلو ودموعي على خدي

ليه مش بمسك حد وافضل ازعق واتكلم بصوت عالي

واقعد احكي عن كل حاجة مدايقاني ، يمكن ارتاح !!

ليه دايماً بكتفي بالسكوت وبالورق وبشوية حروف ؟

لية بختار دايماً دنيا تانية عن الدنيا دي وأعيش فيها

اكتفي بصوت زينب فرحات وهي بتوصف

البنت اللي تقرب للشتا ، وبتبعت استغاثة من سُكات، وأجيب شيكولاته

آكُلها وانا راسي عالمخدة  ... أنام وأصحى على نفس الحال .

" بنت تقرب للشتا "

قطرة مطر

 

دايماً النور بيقطع فـ أكتر لحظة ببقى محتاجة فيها للأمل

دايماً بيقطع وأنا محتاجة حضن ودفا ،،

الضلمة بتعرف إزاي تزرع جواك وحدة حتى لو ناس كتير حواليك

بسأل نفسي : هي الضلمة عايزة مني إيه وأنا أصلاً لوحدي !!

بدايق من نفسي لما أكتب وأحس بإن كل جملة مليانة شكوى وبُكى

مع إني مش ببقى ناوية أكتب عشان أزيد وجعي وجع

أنا ببقى ناوية أسيب هنا بصمة أمل ،

يمكن لما أتوه وأجي أشوف نفسي فـ كلامي ألاقيني

بس للأسف دايماً النور بيقطع وأنا ناوية أدوّر عللي فاتني ..

من كلمة جديدة اتعلمتها اختي الصغيّرة وهي بعيد عني

ومن تعب حست بيه أمي ، ومن شغل يهد الحيل استحملو والدي ،

ومن موقف حصل فـ الكلية كان نفسي أحكيه لأختي ،

دايماً النور بيقطع فـ كل لحظة ببقى نفسي اسمع فيها صوتهم

عمر النور ما سابني أطمّن ، وعمر قلبي ما خف وجعو لأي سبب

شوية دموع مبيفارقوش العين ، وشوية حنين دايماً بينكدوا

كل لحظة حلوة جاية تطبطب عليا ،،

ومع كل ده أنا مؤمنة بمطلع الأغنية اللي بتقول :

"النور مكانو فـ القلوب" ، بس أول ما ابدأ اسمعها وانسجم معاها

بفتكر منير وهو بيفكرني بإن فيه بلاد بيني وبين قلبي

ومطارات وطيارات وشنط سفر وحاجات كتير كده

أنا جلبي ضايع وباينّي نسيتو حِدى أهلي !