للكتابة ... وجع !!
انتَ اكيد مش هتستفاد حاجة
مـ اللي هتقراه بس أنا استفدت كتيــر
انت بس هتساعدني أكتب تاني ،
وارتاح اكتر ... فـ شكراً ليك :)
معرفش إللي هكتبُه ده ممكن حد يقراه ولا هيجري بالماوس عللي فوقُه أو إللي بعدو ويشوف حاجة تشدو أكتر ... بس أنا هكتب ، غتاتة ،على نفسي مش على حد تاني لإني دايماً بمنعني من حاجات كتير ، ومن وأنا صغيَّرة ، بـ حُكم إنهم بيقولوا عليا عاقلة مع إني مش كده خالص :) ، بس دايماً ببقى مبسوطة حتى وأنا مخنوقة وعلى فكرة ... حلو إنك تحس بالمسؤولية وإن كل اللي حواليك بيجولك انت ، لما يحتاجوا حد يثقوا فيه ، وبغض النظر عن الجملة المتناقضة دي إلا إني بحب أكتب ، وبحن للسما ، وفـ وحدتي بلجأ لدوّشة المزيكا ، ولما أحس إن قلبي فاضي أجري أسمع كلمتين عن ربنا ، برتاح لما بشوف وش مصطفى حسني ... أحمد الشقيري ومعز مسعود ، بيفكروني بأيام ما كنت ماشية بالبركة ومش فاهمة يعني إيه دُنيا ... مع إني كل إللي عشتوا فـ الدنيا 18 سنة ، إلا إني شفت كتير ربنا كان بيفهمّني دايماً ومن بدري ، كل حاجة عشتها بدري ... كنت بحس بقرُبه وبحنيّتـه وياما قاللي انو جمبي ووراني إنو جمبي فـ وقت كنت بخاف أزعلُه ليبعد ويسيبني فـ وقت مكونتش اعرف غيرُه حد يطمّني ، وكل اللي حواليا بيتريّقوا وصحابي كانوا بيبعدوا عني عشان انا مبحبش الغلط ، مكنتش اعرف يعني ايه اصلاً "غلط" ومكونتش دوقت طعمُه ... أنا دُقته كتير دلوقتي وبدوقُه كل يوم ... طعمُه مُر ، السجود أحلى ، والبُكى أريَح من ضحك بيوجع ، القراية بتنسيني والكتابة بتفكرني ... عشان كده الكتابة بالنسبالي جهاد وعقاب ليا ، نفسي اشوف وشّي منوَّر من تاني ... كنت دايماً لما ببُص فـ مرايتي بشوف فرحة حتى لو كنت لسة معيّطة ... اتغيّرت اوي ، مبقتش بحبني زي زمان مش فاضلي من المحبة غير .... حبة ، الشيطان بيزاولني عليهم يمكن لو لسة بتقرا تحس ان ده جنان ، انما ... دي أنا دلوقتي ، صراع ، ارهاق ، أرق ، بُكى ووجع وفرحة ناقصة كتييييــــر ...
ربنا عايز يعلمني الدنيا عشان أعرف اعيش فيها لإني من صغري مستخبية فـ حِماه ، وعايز يوّريني مكان الغلط عشان مروحلهوش تاني ، وعايز يحسسني بتأنيب الضمير عشان يرزقني بعد كده لُطف ولين فـ التعامل مع الناس ، وأنا اتعلمت ومتزعلش مني يارب بس كفاية أنا عرفت إن من طبع البشر
يغلطوا ومن طبعك انتَ العفو ، أنا هفضل أكتب وعمري ما هزهق أبداً ،لإني لسة مشوفتش فـ الدُنيا حاجة :'|
حاضر يارب ... هستنى .
هو انا يعني مجنونة لما الاقي نفسي ف كل حرف ف مدونتك و اي مش بزهق و انا بعيد نفس الكلام من امبارح(ايوة من امبارح و انا هنا ف مدونتك اقرى و اعيد و ف كل مرة بلقى نفسي اكتر)
ردحذفعلى فكرة كل ما بفتح مدونتك بفتح معاها موسيقى "إشتياق . مروان أنور" هههه بدخل ف جو تاني خالص
سلامي لكي يا اختي