روحي إليكَ .. تُسافر

عن لهفة اللُقا والحنين لنظرة العيون ...
فكرة انك تبقى شايف اللي بتحبهم بعينك مش بصور،
عمر الصور ما كانت بتكفِّي الأحبة، عمرها ما سدت جوع الاشتياق ..
بالعكس، الصور تشبه المية المالحة .. مهما تشرب منها عمرك ما ترتوي،
وهتفضل تعطش زيادة، لإن الصور مُسكِّن، مجرد مُسكِّن مفعوله مسيرُه يزول.

عن لهفة اللُقا اللي عمرك ما هتحس بيها إلا لو جربت الفراق، البعد والسفر ...
حسيت قبل كده انك محتاج تصدق ان اللي بتحبه موجود .. حقيقي وحواليك؟
قادر تدقق في كل تفاصيلة، حركاته، ملامحه،
قادر توصلُّه الكلام اللي عارف إنه مش هيوصل غير بنظرة من عنيك.

ومين فينا مش بيحتاج يبص في المراية كل يوم ويتأكد إن كل حاجه فيه تمام؟
مين فينا مش بيحتاج يبص للحتة اللي من روحه ويتأكد .. انها تمام!

عمرك حسيت قبل كده إن من جواك فاضي .. فاااضي أوي
معندكش حتى طاقة انك تقوم من السرير وتبطل بحلقة فـ السقف ..
عايز تستسلم لوجع مسافات طويلة باعداك عن اللي بتحبهم وعمالة تاكل في روحك
وكل يوم فـ بعدهم تحس انك بتنقص حته، بتتشتت أكتر، وكإنك بتسافرلهم!
نِفسك تسيب روحك تتسرب من بين ايديك وتبات في حضنهم.

اشتقت قبل كده انك تتوه منك، وتسافر بعيد، بعيد حتى عن نفسك؟!
ومتفكرش في اللي ممكن يجرى ..
متفكرش غير انك هتوصلهم وتلاقي نفسك فـ قربهم.

جربت تحفظ نبرات صوت اللي بتحبه، همسه،
الطريقة اللي بياخد بيها نَفَسُه، حتى تنهيدته،
وبقيت بتعرف تميِّز كل حالاته من "ألو"!
جربت تحكي في أي حاجه عشان تطوِّل في المكالمة
وتسمع صوته لأطول فترة ممكنة؟
عارف يعني إيه "الصوت" يبقى هو دليلك الوحيد
اللي بتثبت بيه انك حاسس بالطرف التاني؟ ...
المسافات بتجبرك على كده.

عارفه إنهم بيقولوا في الأمثال إن المسافات مش بس بتتحسب ببعد حبايبك عنك
لأ، المسافات هي انعدام التفاهم ما بينكم حتى لو كنتوا قريّبين،
صحيح دي تصبيرة حلوة بتخلي الواحد يبتسم ويقول لنفسه إن المودة والحب
أكبر من أي مسافات ودايما بيحافظوا على كل حاجة حلوة بين أي اتنين،
بس نسيت أقول إن المسافات بتسبب نقص في الإدراك والتركيز.
 
- هو لو بس ينفع أشوفه مرة!

وصفولي الصبر .. لقيتُه خيال
https://soundcloud.com/hend-emara/w7dhwcldtrnc